Take a fresh look at your lifestyle.

Vritet me breshëri plumbash një 48-vjeçar në Kaçanik, dyshohet se autorët i vunë flakën makinës që kryen krimin – Lajmet e fundit



Vritet me breshëri plumbash një 48-vjeçar në Kaçanik, dyshohet se autorët i vunë flakën makinës që kryen kriminFoto: Zëri / Ilustrim




Mbrëmë para mesnatës është vrarë një person ën rrugën Freizaj-Kaçanik, përkatësisht në Kaçanik të Vjetër.


Policia e Kosovës ka njoftuar se një person është gjetur pa shenja jete në veturën e tij në Kaçanik të Vjetër dhe me t’u afruar kanë vërejtur se ndaj tij kishte pasur të shtëna të shumta, shkruan “Zeri.info”.


Sipas njoftimit, ekziston dyshimi se autorët e këtij krimi kanë djegur veturën nga e cila kishin shtënë në drejtim të viktimës, pasi që në fshatin Soponicë, jo larg vendit të ngjarjes është gjetur kjo veturë e djegur.


Policia ka njoftuar se viktima është 48-vjeçari me inicialet N.C.


Njoftimi i plotë i Policisë së Kosovës, pa ndërhyrje:


VRASJE NË KAÇANIK


Me datën 23.01.2023 rreth orës 23:50 policia e stacionit në Kaçanik ka pranuar një informacion se në rrugën magjistrale Ferizaj–Kaçanik, në Kaçanik të Vjetër një automjet i udhëtarëve ishte jashtë rrugës. Policia e stacionit në Kaçanik menjëherë i ka marrë masat e nevojshme, ka dalë në vendin e ngjarjes dhe policët kanë vërejtur se një person në ulësen e parë të shoferit dyshohej se ishte pa shenja jete. Janë njoftuar ekipet mjekësore të cilët kanë konstatuar se personi është pa shenja jete. Më pas policia ka pranuar një informacion tjetër se në fshatin Soponicë të Kaçanikut afër autostradës një automjet tjetër i udhëtareve ishte përfshirë nga flaka. Ekipet zjarrfikësve kanë dalë në vendin e ngjarjes dhe e kanë shuar zjarrin.


Në lidhje me këtë policët hetues dhe krim teknikët e Sektorit Rajonal të Hetimeve , nën autorizim të prokurorit kujdestar nga Prokuroria Themelore në Ferizaj i kanë marrë veprimet e nevojshme dhe menjëherë i kanë nisur hetimet .


Nga hetimet e para, ekzaminimit të vendit të ngjarjes dyshohet se personi/persona të panjohur në Kaçanik të Vjetër nga afërsia kanë shti breshëri plumbash mbi automjetin dhe shoferin e më pas janë larguar nga vendi i ngjarjes në drejtim të panjohur. Jo larg vendit të ngjarjes në fshatin Soponicë të Kaçanikut është gjetur edhe një automjet tjetër i udhëtarëve i përfshirë nga flaka , ku ekziston dyshimi se personat e dyshuar pasi e kanë kryer vrasjen në Kaçanik të Vjetër i kanë vënë flakën automjetit dhe janë larguar.


Me vendim të prokurorit kujdestar nga Prokuroria Themelore në Ferizaj trupi i pajetë i viktimës N.C (M/K) i moshës 48 vjeçar dërgohet në Institutin e Mjekësisë Ligjore në Prishtinë për obduksion .


Ekipe të Policisë Rajonale të Ferizajt nga sektorë të ndryshëm po punojnë vazhdimisht në grumbullimin e informacioneve në terren për të zbardhur sa më shpejtë rastin .


Për informata tjera do të njoftoheni me kohë. /Zëri


Comments are closed.