Mbahen konsultimet politike mes Kosovës dhe Zvicrës, përmendet edhe kontributi i diasporës – Lajmet e fundit

Zëvendësministri i Punëve të Jashtme dhe Diasporës së Kosovës, Kreshnik Ahmeti, dhe Sekretarja e Shtetit e Departamentit Federal të Punëve të Jashtme të Zvicrës, Livia Leu, të martën udhëhoqën konsultimet politike që u zhvilluan në Bernë midis delegacioneve të Ministrive të Punëve të Jashtme të të dyja vendeve.

Ministria e Jashmte, ka njoftar se përgjatë këtyre konsultimeve u vlerësua lartë bashkëpunimi aktual mes të dyja shteteve, kontributi që Zvicra ka dhënë për Kosovën dhe kontributi i diasporës së madhe shqiptare në institucionet dhe shoqërinë zvicerane.

Ahmeti dhe Leu diskutuan edhe mbi mundësitë e zgjerimit të mëtutjeshëm të bashkëpunimit në fushën e ekonomisë, tregtisë, drejtësisë dhe sigurisë.

“Në rrafshin multilateral, zëvendësministri Ahmeti njoftoi delegacionin zviceran për planet e Republikës së Kosovës për anëtarësim në organizata ndërkombëtare dhe për procesin aktual të anëtarësimit në Këshillin e Evropës.

Ai e falënderoi Zvicrën për votimin pozitiv në Këshillin e Evropës dhe ndihmën e përhershme që ajo ka dhënë në proceset e anëtarësimeve të Republikës së Kosovës në organizata të ndryshme ndërkombëtare e rajonale”, thuhet në njoftim.

Përgjatë takimit u diskutua edhe mbi agresionin e paprovokuar të Federatës Ruse në Ukrainë dhe për ndikimin që kjo luftë ka mbi rajonin e Evropës Juglindore./Zëri