Take a fresh look at your lifestyle.

Pas Prishtinës e Mitrovicës edhe Peja ndalon qarkullimin e trotinetëve nëpër sheshet e qytetit – Lajmet e fundit



Pas Prishtinës e Mitrovicës edhe Peja ndalon qarkullimin e trotinetëve nëpër sheshet e qytetit




Që nga muaji gusht i vitit të kaluar, Komuna e Prishtinës ka marrë vendim për ndalimin e trotinetëve, biçikletave dhe të gjitha mjeteve me veprim motorik ose elektrik në sheshet e kryeqytetit. Po ashtu është ndaluar lëvizja edhe në vendet ku ka frekuentim të madh të këmbësorëve.


Vendim të njëjtë një muaj më vonë e kishte marrë edhe Komuna e Mitrovicës.


Ndërkaq së fundi edhe Komuna e Pejës ka ndaluar lëvizjen e trotinetëve elektrik në shesh.


Zëdhënësi i Komunës së Pejës, Faik Zekaj, në një prononcim për Telegrafin, ka thënë se vendimi ka nisur të implementohet gjatë ditës së hënë.


“Në hyrje të shëtitore janë vendosur shenjat e reja të komunikacionit që thonë: Ndalim i veturave, ndalim i motoçikletave, ndalim i trotinetëve”.


Komuna e Pejës bën të ditur se shenjat do të vendosen edhe te disa vende të tjera ku qarkullojnë këmbësorët.


Telegrafi ka pyetur edhe disa komuna të tjera nëse kanë marrë vendim të njëjtë.


Drejtori i Shërbimeve Publike në Komunën e Prizrenit, Çelë Lamaj ka thënë se kjo komunë nuk ka marrë ndonjë vendim për ndalimin e trotinetëve.


“Jo nuk kemi marr ndonjë vendim për ndalimin e trotinetëve. Por me ligj të komunikacionit trotinetët nuk janë paraparë si mjet transportues. Pritet një amendament në Ligjin e Transportit Publik, nëse futet trotineti, atëherë ligji e rregullon këtë pjesë”, ka thënë Lamaj.


Edhe nga Komuna e Gjilanit, kanë thënë se sa i përket kësaj çështje ende nuk është marrë ndonjë vendim.


“Jo nuk është marrë ende ndonjë vendim për ndalim e trotinetëve elektrik në sheshin e Gjilanit”, ka thënë Besart Selimi nga zyra për Informim.


Telegrafi ka provuar të kontaktojë përmes telefonit edhe Komunën e Gjakovës dhe Ferizajt, por të njëjtit nuk janë përgjigjur.


Image


Image


 


Comments are closed.