Take a fresh look at your lifestyle.

Çuditet Hoti: Qeveria ndali “gjakderdhjen financiare“, por i rriti subvencionet për ndërmarrjet publike – Lajmet e fundit



Çuditet Hoti: Qeveria ndali “gjakderdhjen financiare“, por i rriti subvencionet për ndërmarrjet publike




Ish-kryeministri Avdullah Hoti, ka kritikuar Qeverinë e Kosovës për rritjen e subvencioneve ndaj ndërmarrjeve publike.


Sipas tij, në Qeverinë Kurti, janë rritur për gjashtë herë subvencionet nga buxheti për këto ndërmarrje, e që po përdoren më shumë për të larguar punëtorë nga puna.


“Çudi me këtë Qeveri. E ka ndaluar “gjakderdhjen financiare” të ndërmarrjeve publike, por për periudhën janar-qershor 2022, i ka rritur për gjashtë herë subvencionet nga buxheti për këto ndërmarrje – nga 1.92 mil euro më 2021, në 12.39 mil euro sivjet.


Me gjasë, një pjesë e konsiderueshme e këtyre mjeteve po shkojnë për të larguar punëtorë nga puna në Telekom përmes skemës që ua paguan përnjëherë 24 paga mujore atyre që lëshojnë punën. Fatkeqësisht, kjo skemë po rezulton me ikje të kuadrove më të mira nga Telekomi, pasi kuadrot më të mira kanë më shumë alternativa në treg”, ka shkruar Hoti.


Hoti thotë më tej se Qeveria po i largon kuadrot për t’i zëvendësuar me të tjerë nga partia në pushtet.


“E vërteta është, fatkeqësisht, se taksat e qytetarëve po përdoren për të larguar punëtorë nga puna. Duket se “gjakderdhja financiare” – ky term morbid që u fut në diskursin politik – po i ndodh buxhetit të shtetit me vendime qeveritare”.


“Duke qenë se Telekomit po i ikin kuadrot, detyrimisht do të detyrohet të rekrutojë punëtorë së shpejti. A nënkupton kjo se po largohen punëtorët ekzistues për tu zëvendësuar me të tjerë nga partia në pushtet?! Çfarë politike e mbrapshtë është kjo?!”, ka shkruar Hoti në Facebook. /Zëri


Comments are closed.